Blomkoolsop

Genoeg vir 6 mense

115 g (125 ml) botter

3 sprietuie, gekap

2 knoffelhuisies, fyngekap

1 kop (500 g) blomkool, in kleiner stukke gebreek

1 rooi brandrissie, fyngekap

500 ml hoenderaftreksel

250 ml melk

sout en varsgemaalde swartpeper

225 g chorizo-wors, in ringe gesny

55 g (60 ml) botter

1 Verhit die botter in ’n middelslagkastrol tot goed warm. Voeg die sprietuie en knoffel by en roerbraai 3 minute of tot dit begin verbruin. Voeg die blomkool by en roerbraai nog 5 minute. Voeg die brandrissie, aftreksel en melk by en bring tot kookpunt. 

2 Laat kook 10-15 minute of tot sag en gaar. Geur goed met sout en peper. Puree in ’n voedselverwerker teen ’n hoë spoed tot ’n gladde sop. 

3 Verhit die 115 g botter in ’n pan en braai die chorizo vir 3-5 minute tot bros en tot die botter ’n rooi kleur aanneem. Skep die sop in bakkies en skep chorizo en lepels vol botter bo-op. Sit dadelik warm voor.

Wenk: Vir ekstra smaak smelt jy 60 ml botter oor medium hitte tot dit begin verbruin. Voeg 30 ml brandrissievlokkies by. Verwyder van die hitte en skep lepels vol oor die sop.

Soort-van-naan met lamkoftas

Genoeg vir 4-6 mense

NAAN

280 g (500 ml) koekmeel

180 ml louwarm water

1 x 10 g sakkie kitsgis

5 ml sout

15 ml swart uiesade

115 g (125 ml) botter, gesmelt

KOFTAS

500 g maalvleis

20 ml fyn koljander

1 hand vol vars koljander, gekap

10 ml fyn komyn

1 brandrissie, gekap

1 eier

sout en varsgemaalde swartpeper na smaak

60 ml olyfolie

250 ml suurroom (crème fraiche) vir voorsit

1 NAAN Verhit oond tot 180 °C en plaas ’n groot bakplaat in die oond om saam met die oond warm te word. Meng al die bestanddele vir die naan saam, behalwe die botter. Meng tot

’n deeg vorm en knie vir 3 minute. Los eenkant op ’n warm plek terwyl jy die koftas maak (die deeg hoef nie te rys nie, net ’n bietjie ontspan). 

2 KOFTAS Meng al die bestanddele behalwe die olie en room. Gebruik jou hande en vorm lepels vol van die maalvleis om sosatiestokke se punte. Druk stewig vas. 

3 Verhit die olie in ’n pan en braai die kebabs sowat 5 minute per kant of tot goudbruin. Plaas op die bakplaat en bak verder in die warm oond tot gaar – sowat 10 minute.

4 Verdeel die naan in 8 porsies en rol uit op ’n meelbestrooide oppervlak in ’n lang traanvorm. Haal die warm bakplaat uit die oond en plaas die deeg daarop. Bak vir 10-15 minute of tot uitgepof en bruin. Verwyder uit die oond en verf dadelik met botter. Sit warm voor saam met koftas en bietjie suurroom.

Maklike oliebolle 

Genoeg vir 6 mense

250 ml melk

210 g (250 ml) strooisuiker

40 g (45 ml) botter, gesmelt

3 eiers

25 ml bakpoeier

5 ml kaneel

700 g (1250 ml) koekmeel plus ekstra vir uitrol

sonneblomolie vir diepbraai

vanieljesuiker – kyk by supermarkte se bakafdeling

250 ml versiersuiker

sap van 1 suurlemoen

45 ml kakaopoeier

1 Plaas die melk, suiker, botter en eiers in ’n elektriese menger se bak. Sif die bakpoeier, kaneel en koekmeel saam. Voeg dit by die melkmengsel en meng teen ’n medium spoed tot ’n stywe deeg. 

2 Sprinkel ’n dun lagie meel op jou werkoppervlak en keer die deeg daarop uit. Rol met ’n koekroller tot sowat 1,5 cm dik. Gebruik ’n 10 cm-koekiedrukker en druk sirkels in die deeg. Gebruik ’n 2 cm-drukker en druk ’n gaatjie in elke deegsirkel.

3 Verhit die olie tot goed warm (die olie is reg sodra jy ’n stukkie deeg daarin gooi en dit dadelik begin borrel). Braai die deegsirkels in die olie tot goudbruin en bros aan albei kante, sowat 5 minute per kant. Dreineer op kombuispapier en rol in vanieljesuiker. 

4 Meng die versiersuiker en suurlemoensap saam tot ’n gladde, loperige versiersel. Voeg ’n paar druppels water by indien nodig. Skep oor die oliebolle en sif kakaopoeier daaroor. Sit warm voor met espresso.

Wenk: Moenie die olie te warm maak nie, anders sal die oliebolle bruin braai voor dit gaar is in die middel. Dit moet stadig braai oor medium hitte. Jy kan die oliebolle ook in kaneelsuiker rol.